20 November 2009

မိုက်ကယ်လန်းစ် တေးဂီတအဖွဲ့ မြန်မာပြည် လာမည်

ကမ္ဘာ့နာမည်ကြီး ဂီတအဖွဲ့ တခုဖြစ်သည့် မိုက်ကယ်လန်းစ်တူရော့ခ် (Michael Learns to Rock) သည် စီးပွါးရေး လုပ်ငန်းကြီးတခုဖြစ်သည့် ထူးထရေဒင်း၏ ကမကထပြုမှုဖြင့် ဒီဇင်ဘာလအတွင်း မြန်မာနိုင်ငံသို့ လာရောက် ဖျော်ဖြေမည် ဖြစ်သည်။

၂၀၀၈ ခုနှစ် မေလအတွင်း ဧရာဝတီ မြစ်ဝကျွန်းပေါ်ဒေသအတွင်း တိုက်ခတ် ဖျက်ဆီးသွားခဲ့သည့် နာဂစ်ဆိုင်ကလုံး မုန်တိုင်းကြီး၏ မုန်တိုင်း ဒုက္ခသည်များအတွက် ရန်ပုံငွေ တေးဂီတပွဲအတွက် စီစဉ်ပြီး ဖြစ်ကြောင်းနှင့် အာဏာပိုင်များ၏ ခွင့်ပြုချက် ရရှိရန် စောင့်ဆိုင်းနေဆဲဖြစ်ကြောင်း ရန်ကုန်ရှိ ထူးထရေဒင်း ကုမ္ပဏီမှ တာဝန်ရှိသူတဦးက မဇ္ဈိမကို ဗုဒ္ဓဟူးနေ့က ပြောသည်။

`ကျနော့်အထက် အရာရှိတွေက တေးဂီတအဖွဲ့နဲ့ ဆက်သွယ် ဆောင်ရွက်နေပါတယ်။ ဒီ MTLR တေးဂီတအဖွဲ့ကလည်း မြန်မာပြည်ကို လာရောက်ဖျော်ဖြေဘို့ မူအားဖြင့် သဘောတူညီထားပါပြီ´ ဟု သူက ပြောသည်။

ဤကမ္ဘာ့နာမည်ကြီး ပေါ့ဂီတအဖွဲ့သည် မြန်မာနိုင်ငံသို့ ပထမဆုံးလာ ရောက်ဖျော်ဖြေမည့် ဂီတအဖွဲ့ ဖြစ်မည်ဖြစ်ကြောင်း မြန်မာနိုင်ငံ ဂီတအစည်းအရုံး အတွင်းရေးမှူး မောင်သစ်မင်းက ပြောသည်။

`အစီအစဉ်အတိုင်း လုပ်ဖြစ်မယ်ဆိုရင်တော့ ဒါ မြန်မာနိုင်ငံကိုလာတဲ့ ပထမဆုံး နိုင်ငံတကာ ပေါ့တေးဂီတအဖွဲ့ ဖြစ်မှာဘဲ´  ဟု မောင်သစ်မင်းကပြောပြီး ဤသို့ နိုင်ငံခြား တီးဝိုင်းတဝိုင်း လာရောက် ဖျော်ဖြေခြင်းကို ပရိသတ်ကလည်း အလွန်အမင်း စိတ်အားထက်သန်စွာ စောင့်မျှော်နေကြသည် ဟုဆိုသည်။

ဒီဇင်ဘာလအတွင်း ကျင်းပရန် စီစဉ်ထားပြီး ပွဲစီစဉ်သူများက မြန်မာနိုင်ငံ လူမှုဖူလုံရေး၊ ကယ်ဆယ်ရေးနှင့် ပြန်လည် နေရာချထားရေး ဝန်ကြီးဌာန၏ ခွင့်ပြုချက်ကို စောင့်ဆိုင်းနေဆဲ ဖြစ်သည်ဟု ဆိုသည်။

ပွဲမှရရှိသည့် ငွေများကို ဧရာဝတီ မြစ်ဝကျွန်းပေါ်ဒေသအတွင်း မုန်တိုင်းခို အဆောက်အဦများ ဆောက်လုပ်နိုင်ရေးအတွက် လှူဒါန်းမည်ဖြစ်သည်ဟု ထူးထရေဒင်း ကုမ္ပဏီအရာရှိ တဦးက ပြောသည်။

ဤဂီတအဖွဲ့တွင် အဆိုတော်များအဖြစ် Jascha Richter, Kare Wanscher, Mikkel Lentz တို့ ပါဝင်မည် ဖြစ်သည်ဟု အဆိုပါ တာဝန်ရှိသူက ပြောသည်။

MLTR အဖွဲ့၏ Sleeping Child, 25 Minutes, Take me to Your Heart, Blue Night, Paint My Love တေးသီချင်းများသည် မြန်မာပရိသတ်များအကြား ရေပန်းစားသည်။

ဆိုရလွယ်ကူသော ဂီတသံစဉ်များကြောင့် MLTR ၏ သီချင်းများသည် မြန်မာပရိသတ်များအကြား အလွယ်တကူ ထိုးဖောက် ဝင်ရောက်နိုင်ခဲ့သည်။

MLTR အဖွဲ့၏သီချင်းများကို မြန်မာပြန်ဆို သီဆိုနေသော မြန်မာအဆိုတော်များ၏ ပွဲဦးထွက် တေးအယ်လ်ဘမ်များလည်း ယခုထိ ဆက်လက် ထွက်ရှိနေဆဲ ဖြစ်သည်။
မဇ္ဈိမမှတဆင့်

No comments:

Post a Comment

မည်သည့်အကြံပေးစာကိုမဆို ဝေဖန်စာကိုမဆို ရေးသားနိုင်ပါသည်။မိတ်ဆွေတို့၏ အကြံပေးချက်များသည် ကျွန်တော်အတွက် အားအင်၊အကြံဥာဏ်သစ်များ ဖြစ်ပါသည်။

 

Copyright © 2009 ဒေါင်းဇာနည် All rights reserved.